اختشى يا بنت عيب

الموضوع زاد..عيب اووى..ميصحش كده
ايوه انا بكلم على البنات اللى لبسها بيبقى اوفر - مش بلوفر - يعنى ضيق او مفتوح حبة او حبتين
انا شايف انه موضوع مؤذى وبيضرها وبيضر ناس كتير وبيخلى الشاب بيركز فى حاجات بعيدة شوية عن المطلوب منه
الكلام ده كنت بتناقش فيه مع اخت عزيزة وكان ليها وجهة نظر فى الموضوع وحبيت اعرضها عليكم..هيا شايفة ان البنات دول غلطنين ومش مفروض يعملوا كده..وان الولاد برضه غلطنين عشان مدام ربنا حيحاسبهم لو عملوا او اتصرفوا بطريقة ما غلط نتيجة اللى شافوه فمعنى كده انهم ممكن مايبصوش...حضر فى دماغى ساعتها موقف يعنى لو واحد واقف فى بلكونة وكب ميه ساخنة على الناس اللى ماشية لو حد شتموا اكيد حيبقى علي اللى شتم ذنب..بس برضه اللى كب غلطان والشتيمة رد فعل طبيعى من شخص عادى ولو الراجل متسامح ممكن يقول ربنا يسامحك بس مش كتيرر كده..ايه رايكم فى الموضوع ده

الصداقة

الصداقة كلمة حلوة ومعناها احلى..مفيش احلى من ان الواحد يكون ليه صاحبه يقف جنبه وقت الشدة يفرح معاه وقت
الفرح يديله رأيه فى اللى محيره و حاجات كتييير بس ده مش موضوعنا

لكن الموضوع اللى انا ملاحظه ان الصداقة بين الولاد وبعض بتبقى اجمد ما يكون ومش ممكن يسيبه بعض طول مهما صحاب والزعل بينهم ممكن نقول مرفوع..لكن الصداقة بين البنات وبعض بحس انها لحد ماتفرج , ممكن تبيع صحبتها علشان حبيبها , ممكن يزعلوا لاى سبب بسيط وميكلموش بعض تانى..بحس انه فيه غيرة شوية, خوف من الشماتة مش عارف بس ياريت اللى عنده راى فى الموضوع ه يقول ويفهمنى لو كنت مش واخد بالى

Happy Valentine's day to SINGLE girls

الاول بسم الله الرحمن الرحيم و ده اول بوست فى البلوج الجديد قال و قالت و ان شاء الله حنقطع بعض انا وفيمتو ومتخافوش يا بنات انا فمينست اوى يعنى معرفش ابويا فى الحجات دى

وبما أن طبعا ليدز فيرست فانا حبتدى اول بوست واتمنى ان شاء الله يعجبكو

بما ان الفالنتين يوم الاربع ان شاء الله واللون الاحمر كان منتشر فى المحلات من اول فبراير اصلا و الهدايا الحمرا فى كل مكان و كل المجلات بتكب عن الفالنتين وكلوز اب قرب اكتر فى كل حتة مع انى بستعمله من زمان يعنى محدش عبرنى ليه ما علينا المهم قلت نجدد ولانى شخصيا بعانى من الخنقة دى كل سنة يعنى هما يعنى البنات اللى ملهمش حبيب ولا خطيب ولا جوز خلاص ملهمش لازمة مثلا محدش يراعى شعورهم ابدا لو مشيوا فى الشارع تيشرتات حمرا و هدايا حمرا و محلات حمرا لو قعدو فى البيت فى التلفزيون ام بى سى تو تهرينا افلام رومانسية لما الواحدة اعصابها تعبت يعنى

المهم فكرت انا و صحباتى اللى زى حلاتى نعمل ايه فى اليوم ده لغاية ما طلعنا بفكرة مفتكسة قولنا مش كل الناس بتلبس احمر احنا بئى حنلبس اسود فى اسود وحنروح سيتى ستارز اللى بيبقى مبدور لون احمر طبعا و حنلبس نضارات سودا عشان منشوفش اللون ده اصلا و حنخش فيلم رعب عشان نطير الموود الرومانسى بتاع اليوم ده

واكيد طبعا اى حد حيشوفنا بالمناظر دى حيعرف على طول العرض من اللون الاسود و ساعتها بئى نعمل تقليد جديد فى البلد والناس تبتدى تاخد بالها مننا و يراعو شعورنا شوية و ياريت اى واحدة مخنوقة زينا تيجى تنضمنلنا احنا حنعد هناك من الساعة 3 و تبقى مظاهرة سواد بئى

----------------------------------

تحديث: اما عن صحابى فتيات الثانوية العامة الغير مرتبطين برضه الجيل ده بتطلع منه افكار جامدة ندى صاحبتى قررت تكتب جواب لنفسها و تبعت هدية وورد لنفسها و قالتلى اقرالك حتة من الجواب ولا خليها لما اخلصه وابعتهولى ويوصلنى واقراه قولتلها لا قوليلى حتة قالتلى كتبت انا بحبنى اوى ومقدرش اعيش من غيرى و بوحشنى وانا قدامى وقالتلى انها كمان حتفاجئها و تفتح باب الشقة وتحط الورد قدام باب بيتهم و ترن الجرس وتقفل الباب وبعدين تخش جوا وتطلع تفتح الباب تلاقى الورد و تقوم متفاجأة بئى و تقول يخربيت عقلى ربنا يخلينى لنفسى و ميحرمنيش منى ابدا

الحقيقة يا بختك بيكى يا ندى رومانسية طحن بس اوعى تتأخرى عليكى لحسن تفكترى انك نسيتى الفالنتين و تزعلى منك

اما بالنسبة للولاد الغير مرتبطين انا مالى بيكو عندكو فمتو بئى يقلوكو تعملو ايه ولا انشلة عنكو ما عرفتو تعملو ايه حتى مش مشكلتى ايه الناس العجيبة دى